Ya aresta mga autoridad con el numero uno “wanted” persona del ciudad de Zamboanga na un “law enforcement operation” na provincia del Zamboanga Sibugay, el policia local ya habla del Martes.
Asegun con Police Colonel Alexander Lorenzo, el Zamboanga City Police Office, con el wanted persona ya conose como si Amado Iso, 47 años el edad y residente de Barangay Mampang, en este ciudad.
Si Lorenzo ya habla cay con Iso ya aresta mga personajes del 1st Zamboanga City Mobile Company (1ZCMFC) con el suporta de otro mga operativas del policia mga alas 7:14 del Domingo aga na Sitio Pines 2, Barangay Sanito, Ipil, Zamboanga Sibugay.
Asegun con Lorenzo, si Iso tiene pendiente orden de aresto por el crimen de “eight counts rape” sin recomendao piansa estaba na un tribunal del ciudad de Zamboanga del Septiembre 9, 2021.
Con Iso, despues su aresto, ya lleva na policia del Ipil para el inicial documentacion y ya lleva para na ciudad de Zamboanga mga personajes del 1ZCMFC. (B. Garcia)