Dos personas el ya aresta y ya confisca P603,000 valor de smuggled productos de petrolio el mga autoridad na dos separao operaciones contra smuggling na provincia de Tawi-Tawi, asegun con el policia del Sabado.
El Philippine National Police-Maritime Group (PNP-MG) ya nombra con el dos arestao personas como canda alias Jun, residente del municipio de Bongao y si alias Allan, residente del municipio na Languayan.
Asegun con el PNP-MG, el mga personajes del 1st Special Operations Unit (1SOU) ya aresta con Jun mientras ta maneja le un banca de motor nombrao como el M/B Ayong mga alas 9:30 del Viernes denoche na mar del Bongao, el capital del provincia de Tawi-Tawi.
Asegun con el PNP-MG, ya confisca 29 drums de crudo que tiene el valor de P261,000 na banca de motor que ta maneja si Jun.
El PNP-MG ya habla, ya coge tamen el mga personajes del 1SOU otro banca de motor nombrao como el Young Boy que ta maneja si Allan mga alas 10:05 del Viernes denoche na mar del municipio de Languyan.
Asegun con el policia, ya confisca 38 drums de crudo que tiene el valor de P342,000 na banca de motor ta maneja si Allan.
El dos arestao suspechao y el mga co nfiscao contrabando ya pone bajo’l custodia del 1SOU y esperansao entrega na Buro de Aduana para el proceso legal.
El dos operaciones ta confirma el firmi dedicacion del PNP-MG para supresa smuggling y asegura el seguridad del borde de maritima del pais, por medio de estricto enforsada del leyes de maritima. (B. Garcia)