El mga personajes del Tawi-Tawi Maritime Pulis Special Operation Unit-1 ya salva con un lancha que tiene muntao 16 personas na provincia del Tawi-Tawi, asegun con el policia del Jueves.
Asegun con el policia maritima, con el 16 personas ya salva del Lunes na mar del municipio de Bongao, el capital del provincia de Tawi-Tawi.
Asegun con el policia maritima, el 16 salvao personas compuesto de sinco tripulantes del lancha, el M/L Zaitrish, y el once mga pasajeros que ta inclui el popular vlogger ‘Kulas’ of BecomingPilipino FB page.
Base na investigacion, el M/L Zaitrish ta viaja desde municipio de Mapun para na Bongao cuando ya queda malo el makina del lancha dejando con este man anud na mar del Bongao.
El personajes del policia maritima base na Tawi-Tawi que ta encabesa si Police Captain Norman Paul Duaso enseguidas ya responde muntando na un barco de patrulla y ya puede columbra con el M/L Zaitrish na vicinidad de Sanga-Sanga, Bongao.
Asegun con el policia, el barco de patrulla del policia maritima ya hala con el lancha y ya llega na pantalan de chino mga alas 6:30 del Lunes denoche. (B. Garcia)