Uno del mga bien “wanted” persona ya aresta mga autoridad na un operacion de aplicacion de ley (law enforcement operation) na costa este del ciudad, asegun con el policia local del Lunes.
El policia local ya nombra con el arestao bien wanted persona como si Eric Penero, 33 años el edad.
Asegun con el policia, con Penero ya aresta mga alas 9:05 del Domingo aga na Zone 5, Barangay Victoria, na costa este del ciudad.
Asegun con el policia, si Penero tiene pendiente orden de aresto dos cuentas de rapto sin recomendao piansa y sinco cuentas de rapto por medio de agression sexual con P200,000 recomendao piansa cada un cuenta.
El policia local ya habla cay si Penero amo el numero ocho bien wanted persona na jurisdiccion del Zamboanga City Police Station 3 (ZCPS3).
Con Penero ya detene na quartel del 1st Zamboanga City Mobile Force Company y ay lleva conele na quartel del Zamboanga City Police Office antes que ay entrega conele na concierne tribunal. (B. Garcia, photo Courtesy of ZCPS3)