El mga oficiales, personajes, y empleado civil del Western Mindanao Command (Westmincom) ya recivi bakuna contra flu del Martes.
El clavada de bakuna ya hace na quartel del Westmincom na Campo Navarro, Barangay Calarian, en este ciudad.
El clavada de bakuna ya hace en colaboracion con el “Office of the Assistant Chief of Unified Command Staff for Reservist and Retiree Affairs” del Westmincom que ya encabesa si Capitan Edwin Ello y el oficina regional del Departamento del Salud.
Aquellos con quien ya clava bakuna ta inclui si Rear Admiral Donn Anthony Miraflor, el comandante del Naval Forces Western Mindanao, y si Brigadier General Vincent Incognito, el comandante adjunto del Westmincom, que ya administra mga miembros del fuerza de reserva que ta trabaja na oficina regional del Departamento de Salud.
Ya clava tamen bakuna con cuantos mga dependientes del mga oficiales y soldao.
“Ta sinti yo ahora segurao y mas protejido cay sabe yo tiene yo el defensa na mio sistema que ta pelia contra con el virus de flu,” si Incognito ya habla.
Mientras tanto, si Tiniente General William Gonzales, el comandante del Westmincom, ay recivi bakuna na Diciembre 17.
Si Gonzales ya expresa su gratitud con el oficina regional del Departamento de Salud cay ya facilita sila con el clavada de bakuna.
“El bienestar del de amon mga personajes amo el pirmi prioridad de amon. Ay mira came pirmi cay todo segurao, protejido y na buen estado sila para realisa de ila trabajo y responsiblidad para del mando, del Fuerza Armada del Pilipinas y del de aton pais,” y habla si Gonzales.
(B. Garcia, photo courtesy of Westmincom PIO)