El mga personajes del Guardia Costera del Pilipinas, o PCG, exitosamente ya salva con 32 personas na mar de Sulu, asegun con el PCG del Lunes.
Asegun con el PCG, con el 32 personas ya salva del Sabado na vicinidad de 500 yardas oeste parte del pantalan del municipio de Siasi na provincia del Sulu.
Asegun con el PCG, 23 del 32 salvao personas amo mga pasajeros y el restante nueve mga tripulantes del MPB AK-4 que ya man baliscat del Sabado na vicinidad del municipio de Siasi.
Base na investigacion, si Sam Sabturani, el patron del MPB AK-4 ya decidi man anclaje y esconde na vicinidad de 500 yardas oeste del pantalan de Siasi cuando ya dale canila encuentro mal tiempo mientras ta viaja sila desde Bongao, Tawi-Tawi para Jolo, Sulu.
Pero asegun con el PCG, ya man baliscat siempre el MPB AK-4 que ta dueña si Aradjul Kahalan por causa de grande mareada que ya causa el mal tiempo.
El mga personajes del PCG base na Coast Guard Station-Western Sulu enseguidas ya conduci operacion de buscada y rescate cuando ya recivi sila informacion dese con un concierne residente cay tiene un banca de motor ya man baliscat na vicinidad del pantalan de Siasi.
El mga personajes del PCG exitosamente ya salva conel 23 pasajeros y nueve tripulantes del MPB AK-4 y ya lleva canila na hospital para examinacion medical.
El doctor ya declara na buen salud sila todo.
El PCG ya hila con el MPB AK-4 para na canto’y man y despues enbuenamente ta bolbe na de ila estacion. (B. Garcia)