El Barangay Pangapuyan, uno del ocho isla del ciudad, ya recivi del un nuevo sistema de agua desde con el govierno local en colaboracion con el diferente agencias del govierno.
Este ya vene despues que ya completa el segunda fase (second phase) del proyecto que ta consisti un tanke, sies reservoir, dos tanke de plastic y plataformas y sistema de coleccion de agua’y ulan.
El Alcalde John Dalipe ya entrega con el proyecto con mga oficiales del Barangay Pangapuyan durante el conducida del un programa de libre servicio publico para con mga residentes del barrio del Sabado.
El libre servicio publico ta incluwi distribucion de enpaketao comida, mga cosas para usa na escuela, chinelas, y otros pa.
Asegun con Dalipe, el nuevo sistema de agua ay asegura cay todo’l vivientes del Barangay Pangapuyan ay tene limpio agua’y vivir, cusina, y otras necesidades esenciales. (B. Garcia, photo courtesy of John Dalipe Facebook page)