El oficina de salud del ciudad ya designa mga “vaccination teams” para anda visita casa-en-casa para administra o clava bakuna con mga bata na diferente barrio del ciudad.
Si Maria Christine Lim, el health education and promotion officer del oficina de salud de ciudad, ya habla del Martes mga vaccination teams ya visita del primer dia del “Chikiting Bakunation Days” na mga barrio de Calarian, Manicahan y Talon-Talon.
El Chikiting Bakunation Days es un 17 dias campaña de inmunizacion del mga bata nuevo nacido hasta 23 meses el edad que ya principia del Lunes hasta na Noviembre 29.
El mga bakuna que ta dale con mga bata amo contra para “Tuberculosis, Hepatitis B, Pentavalent, Oral Polio Vaccine, Inactivated Poliovirus Vaccine”, y para “Measles, Mumps and Rubella”.
El campaña amo para asegura el proteccion del mga bata contra mga enfermedad que puede privini por medio de bakuna.
Mientras tanto, el Departamento de Salud tiene el objeto para dale bakuna con 61,849 bata nuevo nacido hasta 23 meses el edad na entero region. (B. Garcia, photo courtesy of Maria Christine Lim | City Health Office)