En una persecucion incesante combate contra proliferacion del mga armas de fuego, o pusil, sin licensia na region autonomo, el mga oficiales del gobierno municipal del sinco municipio na provincia del Maguindanao del Sur exitosamente ya entrega 38 diferentes clase de pusil de alta calibre con el militar.
Asegun con el Western Mindanao Command (Westmincom) del Domingo, el mga oficiales quien ya entrega 38 ocho pusil ta inclui del mga municipio del Shariff Agruak, Datu Abdullah Sangki, Sultan Sa Barongis, Mamasapano, y Radjah Buayan.
Asegun con el Westmincom, con el mga armas de fuego ya entrega el mga oficiales del sinco municipio con el mga tropas del 33rd Infantry Battalion (33IB) durante el presentacion del mga pusil del Viernes na quartel del 33IB na Barangay Zapakan, Radjah Buayan, Maguindanao del Sur.
El exitosamente presentacion del mga armas de fuego sin licensia ya hace posible por medio na implementacion del “Balik-Baril Program”, un programa del gobierno provincial del Maguindanao del Sur que ta suporta con el campaña contra proliferacion del mga pusil hinde licensiao.
Asegun con el Westmincom, con el mga rendido armas de fuego sin licensia ya presenta con Brigadier General Oriel Pangcog, el comandante del 601st Infantry Brigade.
Si Tiniente General William Gonzales, el comandante de Westmincom, alegre con el exitosamente entrego del mga pusil sin licensia y ya alaba con el afirmacion del Joint Task Force Central na campaña contra proliferacion del armas de fuego nohay licensia.
“Sustene kita el de aton compromiso firme en el paz y seguridad del region autonomo por continuamente peleya contra el proliferacion del mga armas de fuego sin licensia,” si Gonzales ya habla. (B. Garcia)