El gobierno local ta continua el distribucion de incentivos con mga octogenarios y nonagenarios na ciudad de Zamboanga de conformidad con el Ordenanza 539.
Asegun con Socorro Rojas, el jefe del Oficina de Desarollo y Bienestar Social del Ciudad, o CSWDO, total de 46 octogenarios y nonagenarios bajo’l oficina de campo 5 del CSWDO el ya recivi de ila dinero incentivo na total cantidad de P460,000 del Martes na centro de ancianos na Barangay Culianan.
Si Rojas ya habla, 41 del 46 recipientes amo mga octogenarios quien ya recivi P10,000 cada uno mientras el sinco nonogenarios ya recivi P10,000 tamen cada uno cay ya aprovecha ya sila el inicial P10,000 cuando tenia 80 años.
Si Rojas ya habla, el mga recipientes del dinero incentivo amo mga residents del mga siguiente barangays: Bolong; Bunguiao; Cabaluay; Cacao; Culianan; Guisao; Landang Gua; Landang Laum; Lapakan; Manicahan; Mercedes; Pasobolong; Sangali; Tolosa; Victoria; Zambowood; y Salaan.
El Ordenanza 539 ta dale financial incentivos con mga personas mayores na ciudad de Zamboanga sin esperar hasta hay llega sila 100 años para aprovecha de tal beneficio.
Bajo na ordenanza, el mga octogenarians tiene el derecho recivi P10,000 cada uno mientras mga nonagenarios permitido recivi P20,000 cada uno, como in gesto de apreciacion y suporta por el de ila contribuciones na comunidad. (B. Garcia)