El mga autoridad ya aresta tres personas, incluido un miembro del Dawlah-Islamiya-Hassan Group (DI-HG), na un operacion de aplicacion de ley na provincia del Maguindanao del Sur, asegun con el militar del Sabado.
Si Tiniente Coronel Ronaldo Mamangun, el comandante del 40th Infantry Battalion (40IB), ya identifica con el arestao miembro de DI-HG como si Salah Tunda, quien conocido tamen como si Salahudin Sabpa.
Asegun con Mamangun, con Tunda ya aresta na un operacion de aplicacion de ley por medio de implementacion de un orden de aresto mga ala 1:30 del Jueves tarde na Purok 2, Barangay Poblacion, Ampatuan, Maguindanao del Sur.
Si Mamangun ya habla, si Tunda tiene pendiente orden de aresto por el crimen de matansa y doble asesinato frustrado.
Con el otro dos personas ya aresta ta lleva armas de fuego sin licensia el combinao grupo de militar y policia del Viernes na Barangay Kulasi, General Salipdad K. Pendatun, Maguindanao del Sur.
Si Tinienete Coronel Roberto Betita, el comandante del 1st Mechanized Infantry Battalion, ya identifica con el mga arestao suspechao como canda Erap Taluyan Guiangkong alias Erap y si Datu Nor Landasan Galmak.
Asegun con Betita, ya confisca na posesion de canda Guiangkong y Galmak un rifle Armalite, un rifle M-14, bandolier y diferentes clase de clip y bala.
El tres arestao personas ya pone bajo’l custodia de policia para el propio disposicion. (B. Garcia)