El Marine Battalion Landing Team-4 (MBLT-4), hunto con varios agencias na Tawi-Tawi, activamente ya participa na actividad de Mangrove Tree Planting y Coastal Clean-Up en aquel provincia, asegun con el militar del Domingo.
Asegun con el MBLT-4, el actividad ya conduci del Sabado na canto’y aplaya del Barangay Mandulan, Bongao, el capital del provincia de Tawi-Tawi.
Asegun con el MBLT-4, el evento es parte del celebracion del Maritime and Archipelagic Nation Awareness (MANA) que ya conduci el Philippine National Police 1st Special Operation Unit del Maritime Group.
“Por medio del de amon esfuerzos colectiva, ya aumenta came conciencia el importancia del mangle y el de ila papel na preservacion del de aton nuestra naturaleza,” el MBLT-4 ya habla na un declaracion.
“Ya conduci came limpieza costera para mantene el limpieza y hermosura del de aton medio ambiente,” ya habla el MBLT-4.
El MBLT-4 ya rendi de ila gratitud con todo’l mga participantes y agencias quien ya paricipa na mencionao actividad.
El MBLT-4 ya hace el llamada con el otro sectores para trabaja hunto para el limpio y verde Tawi-Tawi. (B. Garcia)