El fuerza armada del Pilipinas ya despelga con el Marine Battalion Landing Team-11 (MBLT-11) para na Palawan para reinforsa con el mga tropas y fortalece con el operaciones maritima en aquel lugar.
El mga tropas del MBLT-11 ya munta un barco del Fuerza Naval que ya transporta canila para na Palawan despues de un ceremonia de despedida del Miercoles na Estacion Naval Romulo Espaldon na ciudad de Zamboanga.
Durante el ceremonia, si Brigadier General Taharudin Ampatuan, el diputado comandante del Western Mindanao Command (Westmincom) para el operaciones de defensa interna, ya presenta un Palque de Commando con el MBLT-11 en recognocimiento por el de ila excepcional servicio y profesionalismo mientras ya ase sila de ila mision para proteje con el comunidades y defende el paz y orden na region.
Asegun con el Westmincom, el MBLT-11 ya rendi dedicao servicio na region de Oeste Mindanao, particularmente na peninsula de Zamboanga, desde Noviembre 16, 2016 hasta Septiembre 4, 2024.
El Alcalde John Dalipe del ciudad de Zamboanga ya presenta tamen un Plaque de Appreciacion con el MBLT-11 durante el ceremonia de despedida.
Na su mensaje, si alipe ya expresa su profundo gratitud con el MBLT-11, que ya caracteriza como el “mejor de todo mejor”.
Ya habla tamen si Dalipe cay el MBLT-11 firme hay tene casa aqui na ciudad de Zamboanga. (B. Garcia)