El Oficina del Veterinario del Ciudad ya llama con el mga lideres del barangay para organiza grupo de cogidor de animal na de ila respetivo comunidades.
El llamada ya hace del Miercoles si Doctor Arcadio Cavan, el nuevo instolao veterinario del ciudad, hablando estipulao na existente ordinanza cay mga oficiales del 98 barangay debe crea grupo de cogidor de animal para cogi mga extraviao perro, incluido gato, baka, carabao y cabrito que ta man bira-bira na comunidad.
Asegun con Cavan, limitao de ila mga personajes para cogi extraviao animal na mga barangay, poreso depende na mga lideres de barangay para ase apas con mga extravio animales.
Asegun con Cavan, el de ila oficina ta suporta y guia lang con el mga oficiales del barangay y entrena canila aserca el propio manera na cojida del mga extraviao animales.
Si Cavan ya habla, tiene del mga barangay ya crea ya el de ila grupo de cogidor de animales pero hinde consistente na de ila trabajo.
Si Cavan ya habla, ese el rason si proque ta causa problema mga animal na conumidades como ta causa accidentes, ta morde gente y ta hace calayat basura.
Asegun con Cavan, el mga grupo de cogidor de animales debe entrega con el mga animal na perrera del ciudad para el propio confiscacion y eliminacion.
Asegun con Cavan, el mga dueño del mga animales puede pa siempre saca de ila animal na perrera del ciudad por medio de paga’r el corespondiente multa. (B. Garcia)