Si Maharani Gadaoni-Tosoc, el director regional del Philippine Drug Enforcement Agency (PDEA), ya comenda con el gobierno del municipio de Labangan, Zamboanga del Sur, por el de ila suporta con el bienestar y progreso del mga constituentes por medio na establisada del de ila “Balay Silangan Reformation Center (BSRC)”.
Si Gadaoni-Tosoc igualmente ya alaba con el policia del municipio de Labangan por el de ila infatigable esfuerzo para asegura el proteccion y seguridad del comunidad.
Con el BSRC, que ya inagura del Lunes, ya establisa na daan edeficio municipal del Labangan.
Asegun con Gadaoni-Tosoc, el inaguracion del BSRC es el principio del de ila viaje para na transformacion, que ay cambia con el vida y reescribi el extraordinario futuro del mga gente de Labangan.
Si Gadaoni-Tosoc ya asegura con el mga gente de Labangan el todo suporta del PDEA na limpiada y mantenida del estado del mga barrios na municipio librao na droga.
Si Gadaoni-Tosoc ya ase acorda con el mga residentes de Labangan cay el de ila trabajo hinde ta termina na inaguracion del BSRC.
“Principio pa lang este del mga desafios del gratificante viaje,” si Gadaoni-Tosoc ya habla esperansando cay ay continua sila trabaja para limpia de droga ilegal con el entero municipio. (B. Garcia)