Sincuenta individuales el ya participa na un-dia entreno de Basic Life Support (BLS) and Standard First Aid Awareness que ya conduci el Distrito del Guardia Costera na Surweste Mindanao, o CGDSWM, na ciudad de Zamboanga.
Asegun con el CGDSWM del Sabado, 40 del 50 participantes amo mga pescador y el restante 10 mga personajes del Estacion de Guardia Costera del Zamboanga del Sur.
El entreno ya conduci del Martes na Centro de Entreno Regional, na Barangay Sinubong, ciudad de Zamboanga.
Asegun con el CGDSWM, el objetivo del entreno amo para mejora el sabidoria y habilidades del mga participantes na First Aid and Basic Life Support que ta inclui el Cardiopulmonary Resuscitation (CPR).
“Este habilidad es crucial para respeusta inmediata na mga emergencias o incidentes de maritime,” el CGDSWM ya habla na un declaracion.
Durante el entreno, asegun con CGDSWM, el mga participantes ya esta comprometido na comprehensivo instruccion na tecnico de CPR y ya introduci canila na varios pasos y directiva na hacida de CPR, incluido compresiones de pecho, y tecnicas de respiracion de rescate para mga de edad, bata, y niños.
El entreno ya conduci el CGDSWM, por medio el Nursing Service Sub-Unit Southwestern Mindanao (SWM), en colaboracion con el Coast Guard Medical Service-SWM. (B. Garcia)