Ya extende inicial ayuda el govierno local con el 32 familyares afectao na incidente de remulleno na Barangay Sinunuc, aqui na ciudad del Miyercoles aga.
Asegun con Socorro Rojas, el hefe del City Social Welfare and Development Office (CSWDO), cay enseguidas el alcalde John Dalipe ya manda mobilisa con el recursos del mga concierne oficina para ayuda con el mga victima cuando ya recivi informacion el alcalde sobre el incidente.
Un persona el ya iri myentras 30 casa y un mosque el ya destrosa na remulleno que ya ocuri mga alas 8:10 del Miyercoles aga na canto’y aplaya na Barangay Sinunuc, este ciudad.
Con el victima ya conose como si Ronald paelmariano, 40 años el edad con quien ya lleva na ospital para el curada medical.
Asegun con Rojas ya dale sila comida con el 32 afectao familya como el inicial ayuda desde’l govierno local.
El oficina del ingiñeriya ya imbia personajes para ayuda con el mga afectao familya compone deila mga casa.
Asegun con Rojas cay ta evalua sila ahora para determina si cuanto el necesita cantidad para dale ayuda con el mga afectao familyares. (B. Garcia, photo courtesy of City Government of Zamboanga)