El mga autoridad ya aresta dos personas y ya confisca droga ilegal y armas de fuego na un campaña contra droga na provincia del Lanao del Sur, asegun con el policia del Viernes.
Si Police Colonel Robert Daculan, el director del policia na provincia del Lanao del Sur, ya identifica con el dos arestao suspechao como canda alias Ara, un mujer, y alias Oden.
Asegun con Daculan, con el dos suspechao ya aresta na un operacion de compra busto mga alas 8:45 del Lunes denoche na Barangay Sur Tatayawan, Tamparan, Lanao del Sur.
Asegun con Daculan, ya confisca na posesion de canda Ara y Oden 4.46 gramos de suspechao shabu enpaquetao na 19 termosellada transparente sobrecitos plastico que tiene el valor de P30,329, un calibre .45 pistol con clip y cuatro bala, y dinero de compra busto.
Si Daculan ya habla, el dos arestao suspechao detenido na quartel del policia del Tamparan en preparacion para el plantada del asunto contra canila por violacion del Ley Integral de Drogas Peligrosas. (B. Garcia)