Tungod sa padayong pagtaas sa kaso sa Covid-19 sa Zamboanga Peninsula, nalakip ang lalawigan sa Zamboanga del Norte sa mga lalawigang gipailawum sa MECQ kun Modified Enhance Community Quarantine sulod sa kine kaadlaw sugod pa kaniadtong Hunyo 1 niining tuiga taman karong adlawa Hunyo 15, apan gideklara kagabii ni Presidente Rodrigo Duterte ang paglugway niini hangtud Hunyo 30, 2021.
Kini gikaguol sa gagmayng magpapatigayun ug ubang mga trabahante nga naapektohan pagmaayo sa among quarantine status ning lalawigan. Kini tungod kay nawad-an sila ug panginabuhian, nga mao lamang ang ilang gisaligan sa inadlaw-adlaw nga panginahanglanon sa ilang pamilya.
Singgit sa katawhan karon ang pagsugod ug pagpang-apud-apod ug ayuda sa lalawigan aron makatabang nila bisan gamay sa pipila ka kan-anan.
Nanawagan usab ang lokal nga pangagamhanan lakip ang mga medical frontliners sa tanang katawhan nga mosubay ug mosanong lamang gyud unta kita sa hangyo sa pangagamhanan nga health protocols ug likayan lamang usa ang mga tipok-tipok aron paspas na mokunhod ang kaso sa Covid-19 ning lalawigan, ug aron usab makunhuran ang kahago ug sakripisyo sa mga nanag-unang moalima sa mga nataptan sa maong gikahadlokan nga sakit. (Lyza Merille Bautista, RPN DXKD Dipolog OIC)