Si Brigadier General Nestor Narag, el comandante del 2nd Marine Brigade (2MBde), ya visita con el municipio de Turtle Islands na provincia del Tawi-Tawi, un isla estrategico na borde del Sur Pilipinas, para evalua con el seguridad y estabilidad del lugar, asegun con el militar del Lunes.
El 2MBde ya habla, durante el visitada del otro semana, si Narag ya conduci dialogo con mga oficiales del municipio para mejora el seguridad maritima y promova colaboracion con mga autoridades local.
Na su visita de cortesia con Alcalde Faizal Jamalul del municipio de Turtle Islands, ya descuti sila conciernes de seguridad del municipio y el papel del mga soldao marinos para proteje con el borde del pais.
Si Narag ya visita tamen con el isla de Great Bakkungan, donde ya conferi le con el mga oficiales del barangay para atende mga asuntos de seguridad local y sabe si cosa el mga desafios y oportunidades ta enfrenta el comunidad na isla.
El isla de Great Bakkungan locao na borde de limites de tratados internacionales que ta separa con el Pilipinas y Malaysia.
El isla es parte del Turtle Island Wildlife Sanctuary, un habitat critical para con el mga turtuga en peligro.
Asegun con el 2MBde, el dialogo ya proporciona un plataforma para un abierto communicacion y comparti entendimiento sobre el importancia na mantenida de segurao y medio ambiente estable. (B. Garcia)