El Departamento de Agricultura-Oficina de Pesca y Recursos Acuaticos (DA-BFAR) ya encabesa con el siembrada de bakawan na Ipil, Zamboanga Sibugay en coneccion con el celebracion del “60th Fish Conservation Week”, el BFAR ya anuncia del Sabado.
Asegun con Muhaimin Maharail, el oficial en-cargao del BFAR na Zamboanga Sibugay, ya siembra sila 500 similia de bakawan na canto’y rio del “Ipil Brackishwater Demonstration Fish Farm (IBDFF)” del Viernes.
Si Maharail ya conduci un orientacion sobre el manera del siembrada con mga participantes del actividad antes que ya principia sila siembra bakawan.
El mga participantes del actividad ya incluwi mga personajes del Zamboanga Sibugay Maritime Police Station y Philippine Coast Guard-Zamboanga Sibugay.
Asegun con Maharail, el mga bakawan ay sirvi como casa, refugio y lugar de comida del mga fescao, marisco, camaron y otros pa clase de vida marina.
El objeto de celebracion del semana anual de conservación del pescado (Annual Fish Conservation Week) amo para omenta el sabiduria y entendimiento sobre el importancia del un sustenable fescaria y del bueno ambiente. (B. Garcia, Photo courtesy of BFAR-9)