Siete personas, incluido un seis años bata, quien ta man anud na mar abordo na un lancha rapida el ya salva el mga autoridad na mar del provincia de Tawi-Tawi, asegun con el 4th Civil Relations Group (4CRG) del Sabado.
Asegun con el 4CRG, con el siete personas ya salva mga alas 6:30 del Lunes denoche aproximadamente 70 millas nauticas este del municipio insular de Mapun, Tawi-Tawi.
El 4CRG nohay mas identifica con el salvao siete personas quien compuesto de sinco hombres y dos mujeres.
Base na investigacion, el siete personas ya viaja abordo na un lancha rapida desde municipio insular de Sitangkai, Tawi-Tawi para na municipio de Luuk, Sulu y despues para na Barangay Capual, municipio del Omar, Sulu.
Pero nohay sila puede llega na de ila destinacion cay eventualmente ya acaba de ila gasolina y ya queda na medio’y mar cay ya sigi sila na grande mareada y fuerte viento con menos visibilidad.
Asegun con el 4CRG, el siete salvao personas ta man lutao y anud na mar del Sulu por seis dias y sinco noches sin comida y agua cuando ya puede canila salva el mga peronajes del Tactical Operations Group Sulu-Tawi-Tawi por medio del Tactical Operations Squadron Mapun.
Asegun con el 4CRG, con el siete salvao personas ya entrega mga alas 10 de Martes aga na subestacion del Guardia Costera del Filipinas y gobierno local del municipio de Pangutaran, Sulu.
El 4CRG ya habla, el excepcional profesionalismo y corage del mga personajes de Tactical Operations Squadron Mapun instrumental na exitoso operacion de rescate. (B. Garcia)