El mga autoridad ya confisca 91 galon de smuggled gasolina na provincia del Tawi-Tawi, asegun con el policia del Sabado.
Asegun con el Philippine National Police-Maritime Group (PNP-MG), con el smuggled gasolina ya confisca del Jueves na canto’y aplaya na Sitio Kasanyangan, Barangay Tubig Tanah, Bongao, Tawi-Tawi.
Asegun con el PNP-MG, nohay con quien ya aresta cay el mga gentes envuelto na transportada del mga gasolina ya esconde cuando ya gole sila el presencia del mga pulis.
Ta cre el policia, con el mga gasolina ya compra na ciudad de Sandakan, Malaysia y ya lleva na Tawi-Tawi pasando na municipio del Sitangkai del mencionao provincia y despues ya lleva para na Bongao.
Asegun con el policia, el mga personajes del Tawi-Tawi Maritime Police Station (MARPSTA), ta man patrulla cuando tiene canila ya informa cay tiene ilegal actividad ta socede na canto’y aplaya del Sitio Kasanyangan, Barangay Tubig Tanah.
El el personajes del Tawi-Tawi MARPSTA ya descubri y confisca con el 91 galon de gasolina na un pundiao jungkong cuando ya verifica sila con el informacion.
Asegun con el PNP-MG, con el mga confiscao galon de gasolina ya lleva na quartel del Tawi-Tawi MARPSTA para el propio documentacion y hay entrega na Buro de Aduana para el propio disposicion.
El Tawi-Tawi MARPSTA ta continua investiga para determina si quien el dueño del mga smuggled gasolina. (B. Garcia)