El mga autoridad ya aresta na un operacion impulsado de inteligencia in alegao reclutador ilegal y ya salva sinco potencial victimas de trafico humano para na Laos na ciudad del Zamboanga, asegun con el policia del Viernes.
El policia ya identifica con el arestao suspechao reclutador ilegal como si Regie Dando, de legal el edad y residente de Ipil, Zamboanga Sibugay.
Asegun con el policia, con Dando ya aresta el mga operativas del policia y militar y personajes del Departamento de Bienestar Social y Desarollo mga alas 2:30 del Jueves tarde na un motel na Paseo de Macrohon, Barangay Canelar, ciudad de Zamboanga.
El policia nohay mas nombra con el mga salvao potencial victimas de trafico humano puera lang de habla’r que ta inclui sila cuatro mujeres y un hombre de mga legal edad.
Base na investigacion, el mga potencial victimas esperansao viaja abordo na un barco de pasajero para na Tawi-Tawi y despues para Malaysia y para na de ila final destinacion na Laos.
El arestao suspechao ya detene el policia en preparacion para el plantada de caso contra conele.
Con el mga salvao victimas ya pone bajo el consejo del Departamento de Bienesta Social y Desarollo antes que hay manda canila bolbe na de ila nativo lugar. (B. Garcia)