El mga autoridad ya aresta dos personas y ya confisca valor de P746,000 smuggled cigarillo mientras ta man patrulla na mar del Basilan, asegun con el policia del Viernes.
El 1st Special Operations Unit-Maritime Group (1st SOU-MG) ya identifica con el dos arestao personas como canda alias Alex, 23 años el edad, y si alias Vic, 30 años, ambos mga residentes del ciudad de Zamboanga.
Asegun con el 1st SOU-MG, con Alex y Vic ya aresta cuando ya cogi sila un enviao de smuggled cigarillo del Lunes na mar del Lantawan, Basilan.
El mga personajes del 1st SOU-MG ta conduci patrulla maritima na mar del municipio de Lantawan y ciudad de Isabela cuando ya columbra sila con un jungkung muntao canda Alex y Vic.
Durante el inspeccion, el 1st SOU-MG ya habla el jungkung ya contene diferentes clase de smuggled cigarillo con el valor de P746,000.
Asegun con el 1st SOU-MG, el dos arestao suspechao y el mga confiscao smuggled cigarillo ya entrega na Lantawan Maritime Police Station para el propio documentacion y el eventual entrego na Buro de Aduana para el propio disposicion. (B. Garcia)