Un miembro del grupo Abu Sayyaf, o ASG, envuelto na infamoso Lamitan siege del año 2000 y tiene el premio de P600,000 para su capturada el ya aresta el mga autoridad na provincia del Basilan, asegun con el policia del Martes.
Si Police Brigadier General Bowenn Joey Masauding, el director del mando regional del policia o Police Regional Office-9 (PRO-9), ya identifica con el arestao miembro del ASG como si Mobin Kullin, quien ya esconde por mas de un decada.
Asegun con Masauding, con Kullin ya aresta na un operacion de implementacion del orden de aresto del Lunes na Barangay Tabiawan, ciudad de Isabela, el capital del provincia de Basilan.
Asegun con Masauding, si Kullin tiene pendiente orden de aresto por el crimen de secuestro y detencion ilegal sin recomendao piansa que ya dale el un corte na ciudad de Isabela del Mayo 6, 2002.
Si Masauding ya habla, si Kullin listao como uno del mga personas mas buscada na pais base na orden conjunta del Departamento del Defensa Nacional-Departamento del Interior y Gobierno Local con el premio de P600,000 para su capturada.
Si Masauding ya habla, si Kullin envuelto na multiples secuestro, incluido na atake na plantacion de Golden Harvest na Barangay Tairan, Lantawan, del Junio 11, 2001 puera na Lamitan siege del año 2000.
Si Kullin presentemente bajo’l custodia del Criminal Investigation and Detection Group-9 para el documentacion y propio disposicion. (B. Garcia)