El mga autoridad ya aresta con un miembro del grupo Abu Sayyaf o ASG na un operacion de aplicacion de ley na ciudad de Zamboanga, asegun con el policia del Viernes.
El policia ya identifica con el arestao miembro del ASG como si Murasidul Abdurahman alias Tidong, 39 años el edad.
Asegun con el policia, con Abdurahman ya aresta na un operacion de aplicacion de ley por medio de implementacion de orden de aresto mga alas 2 del Miercoles tarde na Barangay Ayala, ciudad de Zamboanga.
El policia ya habla, si Abdurahman tiene pendiente orden de aresto sin recomendao piansa por el crimen de secuestro para pedir rescate (kidnap for ransom) que ya dale el un corte na Bongao, Tawi-Tawi, del Septiembre 19, 2019.
Asegun con el policia, si Abdurahman envuelto na secuestro de Joshua Bani, anak de un negociante, del Junio 5, 2014 na Bongao, Tawi-Tawi y del Italiano Rolando del Torchio del Octubre 7, 2015 ciudad de Dipolog, Zamboanga del Norte.
El policia ya habla, si Abdurahman uno del mga siguidores del defunto ASG sub-lider Yasser Igasan. (B. Garcia)