Total de 40 casa el ya man uput na fuego durante un incendio na costa oeste del ciudad, asegun con el Zamboanga City Fire District (ZCFD) del Martes.
El incendio ya principia alas 4:20 del Martes aga na Camacop village, Barangay Calarian, en este ciudad, asegun con Superintendent Christopher Morales, el marshal del ZCFD.
Asegun con Morales, el fuego ya principia na casa de Rogelio Cañete y despues ya man calayat para na otro mga casa todo hacido de palo.
Asegun con Morales, mas o menos 40 familiares el ya perde casa durante el incendio que ya alcansa na Segundo alarma.
Si Morales ya habla cay el estimao valor del propiedad ya quema ya alcansa mas o menos P1.2 million.
Con el fuego ya puede controla mga alas 5:13 del aga y ta precura pa determina el mga bombero el causa del incendio. (B. Garcia, photo courtesy of ZCFD)