Tres conosidos “supporters” del grupo Abu Sayyaf el ya rindi na mga autoridad na provincia del Sulu, el militar ya anuncia del Sabado.
Asegun con Brigadier General Eugenio Boquio, el comandante del 1101st Infantry Brigade, el tres supporters ya rindi con su personajes na Bud Bayug, Talipao, Sulu del Martes.
Si Boquio nohay mas nombra canila puera lang de hablar cay mga supporters sila de Abduljihad Susukan alias Commander Idang, uno del mga lideres del grupo Abu Sayyaf na Sulu.
Con Susukan ya aresta mga autoridad del Agosto 14, 2020 na ciudad de Davao y ya transferi para na un calaboso na Manila.
Asegun con Boquio el rindida del tres supporters ya facilita mga personajes del 2nd Special Forces Battalion, 41st Infantry Battalion, Tactical Operations Group SulTaw (Sulu and Tawi-Tawi), y del 1101st Infantry Brigade.
El tres ya entrega un riple Garand, un riple Carbin, y un calibre .45 pistola.
Si Major General Ignatius Patrimonio, el comandante del Joint Task Force (JTF)-Sulu, ya comenda con el mga tropa por el de ila buen acomplisimiento.
Si Patrimonio ya llama tamen con el restante miembros y supporters del Abu Sayyaf para rindi pacificamente na autoridad. (B. Garcia, photo courtesy of 1101st Infantry Brigade)