El mga autoridad ya aresta tres individuales y ya confisca valor de P20.4 millones de droga ilegal na un operacion contra droga na ciudad de Zamboanga, asegun con el policia del Domingo.
El policia ya habla, dos del tres arestao suspechao ambos mga residentes del provincia de Sulu que tiene el edad de 22 y 36 años, repectivamente, y el terser suspechao tiene el edad de 34 y residente Tawi-Tawi.
Asegun con el policia, con el tres suspechao ya aresta na un operacion de compra busto mga ala 1:38 del Sabado tarde na Sitio San Ramon, Barangay Talisayan, ciudad de Zamboanga.
Asegun con el policia, ya confisca na posesion del tres arestao suspechao tres kilos de suspechao shabu enpaquetao na tres sellado de vacio transparente plastico que tiene el valor de P20.4 millones, 1,399 pedaso de robar dinero, un real P1,000 marcao dinero, sobre y un bolso de plastico.
Asegun con el policia, con el tres arestao suspechao ya detene na quartel del Zamboanga City Police Office en preparacion para el plantada del asunto contra canila por violacion del Ley Integral de Drogas Peligrosas del 2002.
El policia ya conduci el operacion de compra busto con el suporta del mga personajes de inteligencia del fuersa naval na Oeste Mindanao. (B. Garcia)