Dos personas ya muri na un incidente de tiroteo mientras uno del tres suspechao el ya aresta mga autoridad na ciudad de Lamitan, provincia de Basilan, asegun con el policia del Martes.
Asegun con Police Lieutenant Colonel Arlan Delumpines, el hefe del policia del ciudad de Lamitan, el incidente ya ocuri mga alas 7:45 del Lunes denoche na Barangay Balagtasan, en aquel ciudad.
Ya nombra si Delumpines con el mga fatalidad como canda Sagon Jailun, 53 años el edad, y si Unnang Alasa, legal el edad, ambos mga residentes del Barangay Balagtasan, ciudad de Lamitan.
Asegun con Delumpines el arestao suspechao amo si Galib Sasal, 46, un residente del Barangay Balagtasan.
El otro dos suspechao quien ya escapa despues del incidente amo canda Abdullah Panglias, el presente y elejido otravez barrio capitan del Balagtasan y si Absar Panglias, un candidato para kagawad del mencionao barangay.
Asegun con Delumpines, antes del incidente ya man trukusan el mga victima pati el mga suspechao despues que ya insisti el barrio capitan cay na de suyu vehiculo pone con el mga cajon de balota cuando ya ordena el Commission on Elections que transferi el contada del voto para na gymnasium del ciudad de Lamitan desde’l escuela de Balagtasan.
El mga victima, si Jailun y si Alasa, ambos mga supporters de un candidato para barrio capitan na Balagtasan, poreso no quiere sila que usa con vehiculo del presente barangay capitan para transporta con el mga cajon de balota para na gymnasium del ciudad de Lamitan.
Amediante del de ila trukusan, ya tira el mga suspechao con Jailan y Alasa que ya resulta na de ila enseguidas muerte.
Ya recubri mga pulis onse capsula de calibre .45 pistola y dos capsula de riple Armalite na lugar del crimen.
Asegun con Delumpines, con Sasal ya puede aresta na un “follow-up operation” y ya puede confisca un riple Armalite y un riple Garand con mga bala y un bolo na su possession.
Asegun con Delumpines ay planta sila asunto “double murder” y violacion del “gun ban” contra con el mga suspechao. (B. Garcia, photo courtesy of Lamitan City Police Station)