Tres personas, incluido dos candidato para del Barangay and Sangguniang Kabataan Elections (BSKE), el ya muri y dos otro el ya iri na un incidente de tiroteo alla na ciudad de Cotabato, el policia ya reporta del Martes.
Asegun con el policia del ciudad de Cotabato, el incidente ya ocuri mga alas 9:30 Lunes denoche na Barangay Rosary Heights 12, en aquel ciudad.
El policia ya nombra lang con el dos muerto candidato como un tal Nur-Moqtadin y un tal Alfar, ambos mga candidato para kagawad na Barangay Kalanganan 2, y un tal Faisal, un residente del Barangay Kalanganan 2.
El dos mga irido victima nombrao como un tal Saipul y un tal Fajeed Daud, ambos mga residents del Barangay Kalanganan 2, ciudad de Cotabato.
Base na investigacion del policia, el mga victima ta pone materiales de campaña cuando derepente ya tira canila el mga suspechao.
El policia del ciudad de Cotabato enseguidas ya responde na incidente y ya puede aresta con 12 personas quien alegaomente el responsable na incidente.
Asegun con el policia uno del 12 arestao suspechao nombrao como un tal Juhalidin, un candidato para barrio capitan na Rosary Heights 12, ciudad de Cotabato.
El policia ya habla cay el otro uno de mga arestao suspechao un pulis nombrao lang como un tal Dianal y residente del ciudad de Cotabato.
Seis del 12 suspechao amo mga residentes de Guindulungan, Maguindanao del Sur. Dos del seis mga estudiantes y tres mga siembrador.
El restante otro suspechao ta inclui un chufer, trabajante de construccion, trabajador social (social worker), y “self-employed”.
El policia ya puede recubri con el mga suspechao un calibre .45 pistola, un 9-mm pistola y in radio. (B. Garcia)