Un negociante el ya muri na un incidente de tiroteo na costa iste de este ciudad, asegun con el policia local del Martes.
Si Police Colonel Alexander Lorenzo, el Zamboanga City Police Office director, ya nombra con el fatalidad como si Rodolfo Castro, 59 años el edad y un residente del Barangay Cabaluay, en este ciudad.
Asegun con Lorenzo, con Castro ya tira maga alas 7:25 del Lunes aga na Purok 3, Barangay Cabaluay, en este ciudad.
Base na investigacion, ta maneja motorsiclo si Castro de camino para anda vota na Barangay Lapakan cuando ya aparece el dos desconosidos muntao na otro motorsiclo y ya tira con el victima.
Asegun con Lorenzo, si Castro ya sufri un irida de bala na su cabesa que ya causa su enseguidas muerte.
El mga suspechao ya escapa para na direccion del pueblo despues de incidente.
Asegun con Lorenzo ya puede recubri tres capsula de .9-millimeter pistola na lugar del crimen.
Si Lorenzo ya habla cay el Zamboanga City Police Station 3 ta continua de ila investigacion para determina si cosa el motivo y si quien el mga suspechao na incidente. (B. Garcia, photo courtesy of ZCPO)