Un individual de alto valor y su cohort el ya aresta mientras valor de P340,000 droga ilegal el ya confisca el mga autoridad na un operacion contra droga na provincia del Lanao del Sur, asegun con el policia del Jueves.
Si Police Colonel Robert Daculan, el director del policia na provincia del Lanao del Sur, ya identifica con el mga arestao suspechao como si alias Kaway, un individual de alto valor, y su cohorte, si alias Nor, ambos mga residentes del Barangay Raya Saduc, ciudad de Marawi.
Asegun con Daculan, con el dos suspechao ya aresta na un operacion de compra busto mga alas 12:55 del Martes tarde na Barangay West Kilikili, Wao, Lanao del Sur.
Asegun con Daculan, ya conduci sila el operacion de compra busto contra con el dos arestao suspechao siguiendo el bisiada con el de ila actividades ilegal.
Si Daculan ya habla, ya confisca na posesion de canda Kaway y Nor 50 gramos de suspechao shabu enpaquetao na dos termosellada transparente sobrecitos plastico con el valor de P340,000, y dinero de compra busto.
Asegun con Daculan, con el dos arestao suspechao ya detene na quartel del policia na ciudad de Marawi en preparacion para el plantada del asunto contra canila por violacion del Ley Integral de Drogas Peligrosas de 2002. (B. Garcia)