Dos personas el ya aresta myentras mas de P1.4 milyones valor de suspechao shabu el ya confisca mga otoridad na separao campanya contra droga ilegal aqui na ciudad y na provincia del Zamboanga del Sur.
Con el mga arestao suspechao ya conose como canda Christian Siose, 42 años el edad, y si Kenneth Nargemto, 29, asegun con el pulisiya.
Asegun con Police Colonel Alexander Lorenzo, el Zamboanga City Police Office (ZCPO) director, cay con Siose ya aresta na un “buy-bust operation” mga alas 11:40 del Miyercoles denoche na un “pension house” na Barangay Pasonanca, este ciudad.
Asegun con Lorenzo ya puede recubri na posesion de Siose mas or menos 197.40 gramos de suspechao shabu con el estimao valor de P1,342,320, un balutan del “boodle money” que ya pone insima un verdadero P1,000 como markao sen, y un celpon.
Myentrastanto, asegun con Police Lieutenant Colonel Helen Galvez, el portavoz del mando rehyonal del pulisiya, cay con Nargemto ya aresta na separao “buy-bust operation” na Purok 2, Barangay Sudlon, Molave, Zamboanga del Sur mga alas 3:40 del Miyercoles tarde.
Si Galvez ya habla cay ya puede confisca na posesion de Nargemto 15 gramos de suspechao shabu que tiene el valor de P102,000, un bag, un celpon, un motorsiclo, un balutan de “boodle money” que ya pone insima un verdadero P1,000 markao sen.
Todo el dos arestao suspechao detenido myentras ta prepara ya el mga documento para el plantada del formal asunto encontra canila. (B. Garcia, photo courtesy of ZCPO)