Dose miembros del grupo de terorista local el ya rindi na autoridad na provincia del Maguindanao del Norte, asegun con el militar del Sabado.
El 6th Infantry Division (6ID) nohay mas nombra con el mga rendidores terorista local puera lang de habla’r cay mga siguidores sila del faccion de Karialan del Bangsamoro Islamic Freedom Fighters (BIFF).
Asegun con el 6ID, el dos rendidores BIFF ya rendi del Jueves con el mga personajes del 57th Infantry Battalion (57IB) na Barangay Mirab, Upi, Maguindanao del Norte.
Asegun con el 6ID, el mga rendidores BIFF ya entrega mortars, rifles de alta calibre, y Rocket-Propelled Grenande launchers.
Si Tiniente Coronel Aeron Gumabao, el comandante de 57IB, ya presenta con el mga rendidores con Brigadier General Michael Santos, comandante del 603 Infantry Brigade na un simple ceremonia de resentacion.
Asegun con el 6ID, ya atende tamen com el ceremonia el mga ejecutivos del Upi, Maguindanao del Norte, y del Sur Upi, Maguindanao del Sur, y mga oficiales del policia y de indigenas gentes.
Alegre nota si Major General Antonio Nafarrete, el comandante del 6ID, con el esfuerzos del mga soldao del division y Joint Task Force (JTF)-Central para tene paz y progreso.
Si Nafarrete ya ase llamada con el mga restante miembros del BIFF para rendi y logra con el programa de paz del gobierno para puede tamen sila vivi un pacifico vida hunto con el de ila mga familias. (B. Garcia)