Un persona el ya salva mientras otro uno ta esta perdido despues que ya man baliscat de ila banca de motor na provincia de Tawi-Tawi, asegun con el militar del Lunes.
El 4th Civil Relations Group (4CRG) ya nombra con el salvao persona como si Rosello Mario, 34 años el edad, y el ta esta perdido como si Nurton Calma.
Asegun con el 4CRG, con Mario ya salva el mga tripulantes del M/V Noble Steed, un barco de carga de un compania estrangero, del Sabado na 5.5 millas nauticas norteweste del Bongao, Tawi-Tawi.
Si Mario ya esta ya flotante por mas de 37 horas cuando ya puede con ele salva el mga tripulantes del M/V Noble Steed y ya entrega na custodia de 2nd Marine Brigade.
Si Mario ya informa con mga autoridad cay ele y si Calma ta navega na mar cuando ya man baliscat de ila banca de motor.
El 2MBde ya entraga con Mario na Municipal Disaster Risk Reduction and Management Office na Bongao para el necesario examin pisical y medical para asegura na buen salud ele.
Asegun con el 4CRG, ya continua el enbuscada con Calma na mar de Tawi-Tawi. (B. Garcia)