Un fugitivo el ya aresta mientras otro uno el ya voluntariamente rindi con mga autoridad aqui na ciudad de Zamboanga, asegun con un alto oficial del policia local del Martes.
El fugitivo ya rindi ya conose como si Ace Fernandez, 40 años y un chufer, y el quien ya voluntariamente ya rindi amo si Antonio Valdez, III, 27 años el edad.
Asegun con Coronel Alexander Lorenzo, el Zamboanga City Police Office director, con Fernandez ya aresta mga personajes del policia y militar mga alas 10:45 del Lunes aga na Sitio Bataan, Barangay Vitali na costa este del ciudad.
Si Lorenzo ya habla cay si Fernandez listao como el numero cuatro bien “wanted” persona aqui na ciudad de Zamboanga.
Asegun con Lorenzo, si Fernandez tiene pendiente order de aresto po el crimen de cuatro cuentas de rapto sin recomendao piansa que ya dale el un tribunal del ciudad de Noviembre 7, este año.
Mientras tanto, asegun con Lorenzo, si Valdez ya rindi mga alas 11:30 del Lunes aga na Zamboanga City Police Station 7 na Barangay Pasonanca.
Si Lorenzo ya habla cay si Valdez listao como el numero 10 bien wanted persona aqui na ciudad base na Sistema el “E-Warrant”.
Asegun con Lorenzo, si Valdez tiene pendiente orden de aresto por violacion del acto republica numero 7610, mas conosido como el ley que ta dale especial proteccion con mga bata contra abuso, exploitacion y discriminacion, con recomendao piansa de P80,000 ya dale el un tribunal del ciudad de Zamboanga el Septiembre 19, 2022. (B. Garcia, photo courtesy of Zamboanga City Police Office)