Un casa resdencial el ya man uput na un hora y deci-ocho minutos incendio aqui na ciudad de Zamboanga, asegun con el mga autoridad del Viernes.
Asegun con Superintendent Christopher Morales, el Zamboanga City Fire District (ZCFD) marshal, el incendio ya ocuri mga alas 2:37 del Jueves tarde na subdivision del NIA, Barangay Tumaga, en este ciudad.
Asegun con Morales, con el incendio que ya llega na primer alarma, ya puede controla mga alas 2:55 y completamente ya apaga mga alas 3:15 del tarde.
Asegun con el policia local, con el casa residencial ta ocupa si Ibno Susulan, 49 años el edad cay el dueño, si Hadji Aida Adjaluddin, presentamente ta esta na Metro Manila.
Base na investigacion del policia local, el fuego ya principia na cusina y ya man calayat na entero casa residencial.
Asegun con Morales, ya determina pa sila si cuanto el valor de propiedad el ya destorsa na incendio, pero asegun con el policia local, ya alcansa na P1 millon el valor del destroso.
Nohay quien ya iri o sinti duele durante el un hora y deci-ocho minutos incendio. (B. Garcia, photo courtesy of ZCFD)