Un dueño de un tanke de pescao listao como un “street level individual (SLI)” el ya aresta mga autoridad na un campaña contra drorga ilegal aqui na ciudad del Zamboanga, asegun con el pulisiya local del Lunes.
El Zamboanga City Police Station 6 (ZCPS6) ya nombra con el arestao suspechao como si Julio Cabayacruz, 56 años el edad y un residente de Barangay Tugbungan, este ciudad.
Asegun con el ZCPS6, con Cabayacruz ya aresta na un “buy-bust operation” mga alas 1:58 del Domingo aga na un establisimiento de negocio na Barangay Tetuan, este ciudad.
El ZCPS6 ya habla cay ya puede recubri na posesion de Cabayacruz sinco diutay pakete de suspechao shabu que tiene el valor de P3,400, un pitaka, y P200 markao sen.
Ya detene con Cabayacruz na quartel del ZCPS6 en preparacion para el plantada del formal asunto encontra conele. (B. Garcia, photo Courtesy of ZCPS6)