El Western Mindanao Power Corporation (WMPC) del Alsons Power Group ya dona con el govierno local omento maga equipajes que tiene el cantidad de sies punto cuatro milyones de pesos como suporta na programa de salud del ciudad de Zamboanga.
El Alcalde John Dalipe y Doctora Dulce Amor Miravite, el hefe del oficina de salud del ciudad, ya recivi con el donacion desde con Enhiñero Jose Mari Torrejon, el administrador del planta del WMPC, despues del ceremonya de himno nacional ayer aga enfrente del City Hall.
El maga quipajes ya dona el WMPC ta incluwi cuatro vehiculo que tiene el valor de uno punto sinco milyon de pesos cada uno y dies laptop computers con el valor de cuarenta mil pesos cada uno.
Con el maga vehiculos y equipajes ya compra por medio del fondo de electificacion que debe recivi el lugar donde ta opera el planta de coriente na cantidad de un sen cada vendida de un quilowatt hora.
El WMPC ta mantene y opera un planta de electricidad con el capacidad de sien megawatt na Barangay Sangali na costa iste del ciudad.
Si Dalipe ya rindi miles de gracias con el WMPC por el donacion cay un grande ayuda este na maga programa del oficina de salud del ciudad.
El maga vehiculo y equipajes ya entraga ayer el WMPC con el govierno local amo el segundo donacion del companiya.
Del otro semana, ya entraga el WMPC valor de cuatro punto siete milyones de pesos vehiculo y equipajes como suporta na peleya contra con el Covid-19. (B. Garcia)