Walang magaganap na house-to-house search o pagbabahay bahay para hanapin at tukuyin ang mga indibidwal na positibo sa coronavirus disease 2019 (COVID-19).
Ayon kay Presidential Spokesman Atty. Harry Roque, wala namang probisyon o direktibang inilabas hinggil sa house-to-house search para sa mga COVID-19 patients.
Anya, ang gagawin lamang ng mga otoridad ay samahan at dalhin sa mga itinakdang quarantine facilities ng pamahalaan ang mga pasyente na hindi kuwalipikadong mag home o self quarantine.
Gayunman, sinabi naman ni Roque na hindi naman agad-agad ililipat ang mga pasyenteng hindi kuwalipikado sa home quarantine dahil kinakailangan na sila mismo ang mag report sa mga otoridad, at maari rin namang ang mga kaanak o ang barangay mismo ang magbigay alam sa kinauukulan.
Batay sa bagong istratehiyang ipinatutupad ng Department of Health (DOH), papayagan lamang sumailalim sa home quarantine ang mga asymptomatic COVID-19 patients kung mayroon sariling kwarto at banyo sa kanilang tahanan, at wala rin silang kasamang vulnerable persons gaya ng buntis at senior citizen.