Cebu City- Managlahi ang pangangkon sa kagamhanan sa siyudad sa Carcar ug sa VSMMC o Vicente Sotto Memorial Medical Center sa tinubdan sa coronavirus disease o Covid 19 nga nakapatay sa 17 anyos nga lalaki.
Ang teenager nga usa pod ka pasyente sa kidney giadmit sa VSMMC niadtong Abril 23 sa gabii ug gitahong namatay sa impeksyon paglabay sa duha ka adlaw.
Una niini, gipahibawo ni Gob. Gwendolyn Garcia nga nakatala na ang Carcar og unang kaso sa coronavirus.
Pero ang gobyerno sa Carcar nag-post sa ilang official Facebook page nga adunay posibilidad nga nakuha sa pasyente ang virus samtang giadmit sa ospital.
Segun pa sa post, gibutang ang 17 anyos sa ward sa mga adunay SARI o severe acute respiratory illness diin giadmit ang mga pinireso sa city jail nga hitaptan sa virus.
Pero si Dr. Gerardo Aquino, pangu sa VSMMC, mihimakak sa post sa Carcar sa Facebook.
Sa iyang statement, si Aquino mipasabot nga ang pasyente menor de edad pa busa dili mahitabong isagol kini sa mga pasyente gikan sa city jail.
Sumala pa sa hospital chief, gida ang bayungbayong sa Emergency Isolation Department sa VSMMC nianang alas 11:58 sa gabii sa Abril 23 ug gi-swab test paglabay sa pipila ka minutos.
Gisalikway ni Aquino ang pangangkon sa LGU nga gi-swab test ang pasyente dihang kini patay na.