Nagpadayon karon ang pasiuna nga baynte (20) kabuok indibidwal nga unang batch sa nagpailalum og libre nga intensive outpatient rehabilitative services sa SOCCSKSARGEN Drug Abuse Treatment and Rehabilitation Center nahimutang sa Barangay Kawas, lungsod sa Alabel, Sarangani Province.
Kini ang gikumpirma ni Doctor Sharir “Butch” Dulduco, ang provincial DOH officer sa Sarangani ug Gensan ug sya pud ang OIC chief sa maong regional drug rehab facility. Sa bag-uhay lang nahitabo nga regular meeting sa PADAC kon Provincial Anti-Drug Abuse Council sa probinsya sa Sarangani kung diin ang council chairman mao si Governor Steve Chiongbian Solon, gibutyag ni Doctor Dulduco nga sa baynte (20) kabuok karon nga ilang gi-rehab, kasagaran kanila ang gikan sa Sarangani apan adunay mga indibidwal nga gikan sa South Cotabato, Sultan Kudarat ug General Santos City.
Ila na matud pang gibahin ang ilang responsibilidad tali sa LGU kung asa ang pagadawaton nga magpa-rehab sa regional rehab center mao kadtong adunay court order human na-bilanggo ug gitugutan sila sa huwes nga mupailalum og rehabilitasyon human sa ilang gipirmahan nga plea bargaining sa korte pag-angkon sa ilang nabuhat nga sala nga paggamit o pagpayuhot sa ginadiling druga.
Samtang, ang kadtong nanurender sa ilang mga barangay apan wala na-preso ang giatiman sa gihapon sa nagpadayon nga kalihukan karon sa mga munisipyo sa Sarangani nga community-based rehabilitation program o CBRP ug ang Bahay Silangan Reformatory Center sa Malungon. Sa ilang kahimtang nga dili pa tantong nagumon sa ilegal nga druga, sa ilang komunidad sila naga-rehab ubos sa superbsiyon sa mga personahe sa lokal nga gobyerno ug sa pito (7) ka mga mayor.
Segun ni Doctor Dulduco, ongoing karon ang pag-hire sa Department of Health Central Office sa kauluhang Maynila og singkwenta (50) kabuok permanent position para sa Sarangani rason nga sa dili madugay mudawat na usab silag mga pasyente alang sa intensive inpatient services sulod sa regional rehab center.
Ang kini nga multi-million Regional Drug Abuse Treatment and Rehabilitation Center nahimutang sa Kawas, Alabel ang gipondohan kini sa nasud China og mukabat sa P350 Milyon ka pesos. Resulta kini sa nahimong kasabutan nila Pangulong Rodrigo Duterte ug Chinese President Xi Jinping. Sa tibuok Mindanao, Sarangani ug Agusan del Sur lang ang natagaan sa maong proyekto, unang nibarog ang sa Sarangani.
Nipalit og yuta sila Governor Steve Chiongbian Solon, Vice Governor Elmer De Peralta ug mga board member, sa pagsuporta nila Senador Manny ug Congressman Ruel Pacquiao, isip lokasyon sa maong gambalay anaa sa ibabaw nga bahin tapad sa provincial headquarters sa PNP Sarangani nag-atubang sa preskong hangin sa Sarangani Bay. Samtang nakatuka sa DOH ang pagpadagan sa maong pasilidad. Wala nay gastuhon ang Kapitolyo tungod kay ang DOH na ang gapadagan niini.
Samtang, good news alang sa mga adik sa pag-inum ug ilimnong makahubog tungod kay gipamahayag ni Doctor Dulduco nga mudawat na usab sila sa buot magpa-rehab tungod nagumon sa alcohol. Adunay mga eksperto matud pa nga pagabitbiton si Governor Solon aron muhatag og treatment program alang sa kadtong dili mahimutang sa usa ka adlaw kung dili maka-lala og “agua de pataranta.” May gigahin nga usa ka lawak ang DOH alang sa mao nga pag-rehab.
(Image from the web for illustration only)