Naragsakan ti gobierno probinsial kangrunaanna iti Ilocos Norte Tourism Office iti pannakaipalubosen kadagiti umili manipud iti NCR Plus nga agbanyaga.
Invawisda kadagiti umili kadagiti nasao a lugar kas iti Metro Manila ken dagiti kaparangetna a probinsia kas iti Bulacan, Cavite, Laguna ken Rizal ti iyuumayda ditoy Ilocos Norte.
Mangnamnama ti nadakamat apangopisinaan a dakkel ti maitulong ti kunpirmasyon ti Departamento ti Turismo a natalged ken naganas ti agpasiar ditoy Ilocos Norte tapno maallukoy dagiti umili idiay NCR plus nga umay ditoy probinsia.
Immun-una ngem iti daytoy, dinayaw ti DOT dagiti addang nga impatungpal ni Gob. Matthew Marcos Manotoc iti pannakasaluad ti salun-at dagiti umili pakairamanan dagiti sumsumrek ditoy Ilocos Norte.
Karaman iti sinaludaranda ti istrkto a pannakaipatungpal dagiti health protocol iti border ti probinsia ken ti pannakaipasdek ti “tourist triage” a pagdalanan dagiti sumrek a turista.
Nupay kasta, inpalagip ti INTO ti rakurak ti DOT a ti maipalubos laeng a “leisure travel” ket “point-to-point” a dagiti mabalin a pagdagasan dagiti maseknan ket ti pannangan ken kadagiti “personal” a pagkasapulan.
Inbalakad ti INTO ti panagparehistro dagiti interesado nga umay ditoy probinsia iti ilocosnorte.ph, kasapulan ti Valid ID ken ti confirmed booking manipud iti accredited nga accommodation wenno travel agency, mangala ti “Quick Response” wenno QR Code manipud iti (m.me/safepassportal) ken masapul ti panagpa-test. Innayonna a dagiti turista manipud kadagiti lugar nga adda iti babaen ti General Community Quarantine wenno GCQ pakairamanan dagiti lugar nga addaan ti restrictions ket kasapulan ti RT PCR test pakairamanan ti saliva nga isaysayangkat ti Phil. Red Cross a naala duapulo ket uppat nga oras sakbay a sumangpetda ditoy probinsia idinto a kadagiti turista manipud iti MGCQ ket Rapid Antigen Test a naala duapulo ket uppat nga oras sakbay a sumangtpetda ditoy Ilocos Norte ken dagiti turista nga ub-ubing ngem dagiti agtawen ti sangapulo ket walo ken dagiti natataengan ngem innem a pulo ket lima ket masapul a mangipakita iti negatibo a resulta ti RT PCR test a naala iti saan a nasursurok ngem pitopulo ket dua nga oras.
Para iti ad-adu pay nga inpormasyon, tumawag iti Pinili Visitor Center – Tourist Triage South iti (0908) 810 8636. (Rosita Macalipis, RPN DZRL Batac Correspondent)
(Source: Provincial Government of Ilocos Norte)