Cebu City- Wala makahuman sa pagpanghatag sa hinabang salapi ubos sa SAP o social amelioration program ang 25 ka local government units sa Central Visayas nga sagad sakop sa Sugbo.
Mao kini gibutyag sa Department of Social Welfare & Development o DSWD 7.
Segun sa record sa DSWD 7, ang mga LGUs sa Cebu nga napakyas pagtuman sa deadline niadtong Mayo 10 mao ang mga siyudad sa Sugbo, Mandaue, Lapulapu, Talisay, Toledo, Bogo ug Carcar, ug mga lungsod sa Pinamungajan, Badian, Dalaguete, Consolacion, Balamban, Tabogon, Sogod, Alcantara, Compostela, Tuburan, San Fernando, ug Minglanilla.
Sa nasayran, ubos sa Republic Act 11469 o Bayanihan to Heal as One Act, ang SAP gitumong sa paghatag og gamayng alibyo sa kalisod sa mga tawo nga apektado sa krisis sa coronavirus disease o Covid 19.
Samtang sa Bohol, wala usab makakompleto ang Tagbilaran City, Bien Unido, Loon ug Maribojoc sa pagpanghatag sa SAP cash assistance ingon man ang Dumaguete ug Guihulngan City, Negros Oriental.
Gitaho sa DSWD 7 nga mikabat og  891,990 ka pamilya o 84 porsyento sa kinatibuk-ang gidaghanon sa benepisyaryo ang nakadawat sa tag-6 mil nga ayuda sa SAP.