Gitakdang magpatuman ang CIP o Cebu International Port og truck ban aron paghakot og produkto gikan sa alas 5 sa buntag ngadto sa alas 9 sa gabii sugod karong Enero 15.
Ang maong lakang nasabotan sa miting sa PTMB o Provincial Traffic Management Board niadtong Enero 7.
Hinuon, si Edwin Jumao-as, executive director sa TEAM o Traffic Enforcement Agency of Mandaue, miingon nga mahimong makuha sa mga trak ang mga goods sa pantalan gikan sa alas 9 sa gabii hangtod sa alas 5 sa buntag.
Gipahibawo usab ni Jumao-as nga gilugwayan ang adlaw sa pag-pull out sa produkto kay, inay kutob lang sa Biyernes gikan sa Lunes, moabot na kini hangtod sa Domingo o tibuok semana na.
Base sa mensahe sa text ni Leonolo Miole, general manager sa CPA o Cebu Port Authority, ang maong sistema experimental pa lang.
Matod ni Miole, gihimo kini aron pagpahapsay sa dagan sa trapiko ug pagpalambo sa ekonomiya sa Sugbo.
Gani, giingong moluwat unya og executive order si Gob. Gwendolyn Garcia aron maseguro ang pagtuman niini.
Nanghinaot si Jumao-as nga ideliber dayon sa mga trak ang mga goods nga ilang makuha sa CIP aron makadaginot sa gasolina tungod kay gabii na ra ba ang ilang operasyon.
(via Jhon Tadlip/JTY)
Source: Provincial Traffic Management Board
Photo: Cebu International Port