Radio Philippines Network
DXDX GenSan News Provincial News

Tres Milyones Ka Pesos (₱3M) Itunol Nila Governor Solon Ug Sangguniang Panlalawigan Sa Matag Munisipyo Sa Sarangani Province Isip Ayuda Sa Padayong Pagdawat Sa Mga LSI Ug Returning OFW

Aprobado na sa Sangguniang Panlalawigan ang Tres Milyones ka pesos (₱3M) nga pondo alang sa matag munisipyo sa probinsya sa Sarangani aron i-ayuda sa padayong pagdawat sa mga LSI kon locally stranded individual ug sa mga Returning OFW.

Sa nahitabo nga special session niaging adlaw nga Byernes, Baynte-Uno Milyones ka pesos (₱21M) ang na-aprobahan nila Vice Governor Elmer De Peralta ug sa tanang board member alang sa maong katuyuan, tag-₱3M kada lungsod.

Segun ni Board Member Joseph Calanao, ang chairman sa SP Committee on Appropriation, ang maong bag-ong ayuda ang resulta sa makanunayon nga konsultasyon ni Governor Steve Chiongbian Solon sa pito (7) ka mayor sa Sarangani. Wala damha matud pa nga ubay-ubay ang mahidangat tungod buot makauli sa ilang mga munisipyo human sa pag-abri sa programa sa nasyonal nga gobyerno nga Hatid Probinsya.

Ang mga municipal LGU na ang mugasto sa maong pondo apan mag-sentro kini sa padayong pagpalambo sa mga quarantine ug isolation facility sa mga munisipyo. May mga lungsod nga nigamit og mga pension house ug mga resort isip quarantine facility, samtang ang uban ang nagpatindog og mga kaugalingong pasilidad. Gikinahanglan na matud pa sila nga maghimo og mga quarantine room gumikan gamiton na sa DepEd ang mga classroom nga ginagamit. Rason nga gikalipay og dako sa mga mayor ang maong Tres Milyones ka pesos pandungag sa ilang pondo.

Gani, kagahapong adlawa, gi-blessingan na ang Municipal Ligtas COVID-19 Center sa munisipyo sa Alabel sa pamunuan ni Mayor Nonoy Salarda, anaa nahimutang sa Purok Ahai, Barangay Alegria. Anaa sa setenta (70) ka tao ang pwedeng i-quarantine sa nasangpit nga pasilidad, may namuntar ng aircon, telebisyon ug internet connection.

Una ng nakadawat niaging mga bulan og Tres Milyones ka pesos (₱3M) ang matag munisipyo sa Sarangani Province isip ayuda sa relief distribution ug uban pang galastuhan atong panahon nga gipatuman ang mga lockdown. Mahulog nga Sais Milyones ka pesos (₱6M) na ang na-download nga pondo sa Provincial Government sa Sarangani ngadto sa matag lungsod, wala pay apil ang mga donasyon sa mga kagamitan ug ang ayuda sa nasyonal nga gobyerno, lakip na ang hinabang nila Senador Manny ug Congressman Ruel Pacquiao.

Sa pikas nga bahin, mahatag napud sa musunod nga mga inadlaw ang Tres Milyones ka pesos (₱3M) nga pondo alang sa lungsod sa Alabel pagagamiton ang kwarta aron ipatindog og saysenta (60) kabuok balay maka-benipisyo ang hapit 250 ka mga indibidwal. Magsilbi kining relocation area sa mga pamilyang lumad sa Purok Lilab, Barangay Pag-asa nga nibakwit niaging tuig tungod sa nasinatian nga mga tension crack kon pagliki sa mga yuta.

Ang DENR MGB o Mines and Geosciences Bureau na ang ni-rekomenda nga mamalhin silag luwas nga kapuy-an. Ang LGU Alabel ang nipalit og luna sa maong resettlement project samtang ang ipatindog nga mga panimalay saysenta kabuok ang paga-abagahon sa Sulong Kaligtasan program ni Governor Solon pinaagi sa maong Tres Milyones ka pesos nga pondo.

Samtang, mutunol usab og ₱1.5 Milyon ka pesos nga pondo ang Sarangani Provincial Government para sa LGU Kiamba, ipalit og yuta sa relocation site sa Barangay Lomuyon maka-benipisyo ang gatusan ka pamilyang lumad gihapon. Ihikling sila aron dili mapagan sa tubig-baha, landslide ug ubang kalamidad.

Related posts

48 Ka Mga Establisemento Sa Northern Mindanao Hingpit Na Nga Magsira

RPN

Davao City Procures Medical Supplies For COVID- 19 Frontliners

RPN

DUHA KA MGA LAYAKI DAKPAN SA ILLEGAL NGA TARI-TARI

RPN News

This website uses cookies to improve your experience. We'll assume you're ok with this, but you can opt-out if you wish. Accept Read More