Plano nga ilusad sa CDO-LGU ang recyclables segregation program nga ‘Trash to Cashback’ atol sa pag-abri sa Cagayan de Oro City Eco Park karong umaabot kapistahan ning syudad sa Agosto 28.
Ang ‘Trash to Cashback’ inisyatiba sa waste management firm nga Best Environmental System and Technologies, Incorporated kon BEST kansang tumong nga ma-engganyo ang mga residente, opisina ug establisemento nga batasanon ang ensaktong pamaagi sa ‘waste segregation at source’ sa mga recyclables nga basura.
Pinaagi sa pag-segregate sa mga recyclables nga basura diha mismo sa ilang tinubdan, makaangkon sila og ‘environmental points’ nga katumbas sa cashback ug mahimo kining bayloan og mga grocery items sa mga redemption stores.
Tipik sa mga recyclables nga basura mao ang klase-klase nga plastic, papel ug puthaw.
Subay niini, gi-presentar sa mga representante sa BEST ang ‘Trash to Cashback’ program atol sa virtual presentation kagahapon nga giapilan nila ni City Local Environment and Natural Resources Officer Engr. Armen Cuenca, Office for Community Affairs Head Oliver Egypto, mga kapitanes sa 80 ka barangay ug mga miyembro sa Barangay Solid Waste Management Committee. (City Information Office)