Cebu City- Subling gipadayag ni Gob. Gwendolyn Garcia nga ang probinsiya determinado nga motakli ngadto sa “time-based discharge policy” sa mga pasyente sa coronavirus disease o COVID-19 inay magpaabot sa negatibong resulta sa polymerase chain reaction o PCR testing.
Matod ni Garcia, buot niyang matuki kining maong butang sa director sa Department of Health o DOH-7, Dr. Jaime Bernadas, aron paglatid og cut-off date sa implementasyon sa bag-ong polisiya.
Kon mahinumdoman, sa iyang miting sa mga mayor niadtong Sabado, si Garcia mipahibawo nga ang lalawigan mosagop sa discharge policy sa Singapore diin gitugot ang pagpagawas sa pasyente paglabay sa 21 ka adlaw gikan sa pagtakboy sa impeksyon.
Midugang si Garcia nga kon mihimo ang Singapore sa maong sistema, way katarongan nga dili kini mahimo sa Cebu.
Para ni Garcia, ang time-based discharge mas epektibo inay magpaabot sa negatibong resulta sa PCR test nga molanat pa og daghang adlaw tungod sa kadaghan sa sample nga kinahanglang i-test.
Kon wala nay pasyente nga magkinahanglan og repeat testing, sumala pa ni Garcia, makatutok na ang gobyerno niadtong mga pasyente nga adunay timailhan sa virus.
June 3/Local